- 24.12.2023 17:40
Bizi Xalq edən lider – Bütöv Azərbaycanın tək Prezidentinə təbrik əvəzi!
Bu gün Azərbaycan Respublikasının prezidenti, Silahlı Qüvvələrin Ali Baş Komandanı cənab İlham Əliyevin doğum günüdür. Prezidentin 62 yaşı tamam olur.
Azərbaycanın dövlətçilik tarixinə nəzər salsaq görərik ki, bu gün Azərbaycan öz iqtisadi və hərbi tarixinin ən güclü inkişaf dövrünü yaşayır. Təkcə son 200 illik tariximizə nəzər salsaq, çox şey aydın olar. Son 200 il ərzində qonşu dövlətlər tərəfindən istilalara, işğallara məruz qalan Azərbaycan hər müharibənin, hər müqavilənin sonunda torpaq itirib, ərazilərinin bir hissəsindən məhrum olub. Yalnız XXI əsr dünya hərb tarixində ən yenilikçi muharibələrindən hesab olunan, 2020-ci ildə baş vermiş, cəmi 44 gün davam edən Vətən Müharibəsi nəticəsində biz bu tilsimi qıra bildik. Ali Baş Komandan, ordu və xalq bir yumruq kimi birləşib düşməni məhv etdik, onları bir daha baş qaldıra bilməyəcəkləri duruma saldıq. 2023-cü ildə isə cəmi 23 saat davam edən antiterror tədbirləri nəticəsində torpaqlarımızda özlərini dövlət adlandıran terrorçular ordumuzun və Ali Baş Komandanımızın qətiyyəti qarşısında ağ bayraq qaldırdı.
Bütün bunlar İlham Əliyevin mahir siyasətinin, uzaqgörənliyinin, səbrinin və dəyanətinin nəticəsi idi. İlham Əliyev dəfələrlə çıxışlarında deyirdi ki, nəyi nə zaman etmək lazımdır mən bilirəm. Dedi və etdi. Ən doğru zamanda ən doğru qərarları verərək 200 illik məğlubiyyət tilsimini qırdı. 1923-cü ildən Qarabağda Sovet hakimiyyəti sayəsində muxtar status əldə edən, 1988-ci ildən isə yenə də sovetlərin köməkliyi ilə azərbaycanlıları öz doğma torpaqlarından didərgin salan, Xocalı soyqırımı kimi dəhşətli hadisəni bizə yaşadan erməni terrorçularından qisasımız onun əvəzolunmaz rəhbərliyi altında alındı. Bu gün xalqımızın alnı açıq, başı ucadır. Biz qalib xalqıq, biz XXI-ci əsrdə öz torpaqlarını 30 illik işğaldan azad edə bilən yeganə xalqıq. Dünyada 2-ci belə bir xalq yoxdur ki, bütün qərb ölkələrinin basqılarına baxmayaraq, məqsədindən bir addım da geri çəkilməsin, düşmənin başını əzib torpaqlarını azad etsin. Çünki xalqın komandanı nəyi etdiyini yaxşı bilirdi, bilirdi ki, o, haqq yolundadır. Həm də bu haqq yolunda onun arxasında 10 milyonluq Azərbaycan xalqı var. Bu xalq da öz liderinin arxasınca ölümə də getməyə hazırdır. Xalq liderinə, lider də xalqına güvənib inamla, sona qədər getdi.
İlham Əliyevin qətiyyəti təkcə hərbi sahəylə kifayətlənmir. O hələ 20 il əvvəl prezident seçildikdən sonra xalqa verdiyi bütün vədləri yerinə yetirib. 20 il ərzində Azərbaycan misilsiz inkişaf yolunu qət edib. Azərbaycanın iqtisadiyyatı cəmi 20 il ərzində bəlkə də 50 illik bir inkişaf yolu keçib. İnsanların rifah halı dəfələrlə yaxşılaşıb. Ümumi daxili məhsulun həcmi dəfələrlə artıb. Azərbaycan bölgədə söz sahibinə çevrilib. Bütün regional layihələr Azərbaycanın iştirakı və ya vasitəçiliyi ilə gerçəkləşir. Bu gün Azərbaycan ordusu dünyanın ən muasir orduları ilə bir cərgədə dayanır. Vətən Müharibəsində həyata keçirdiyimiz hərbi üsullar bu gün dünya ordularında tədris materialı kimi istifadə olunur. Azərbaycan artıq dünya ölkələrinə silah ixrac edən bir ölkəyə çevrilib. İlham Əliyevin uzaqgörənliyi nəticəsində ölkəmizin beynəlxalq arenadakı mövqeləri möhkəmləndirilib. Çoxşaxəli fəaliyyəti nəticəsində sağlam, müasir, vətənpərvər gənclik modeli formalaşdırılıb. Heç təsadüfü deyil ki, İlham Əliyevin prezidentlik dövründə yetişən gənclər 44 günlük Vətən Müharibəsi dövründə böyük şücaət, qəhrəmanlıq göstərərək böyük Zəfərdə böyük pay sahibi oldu.
İndi bütün gənclərimiz, xalqımız ətrafında sıx birləşdiyi lideri vasitəsilə qələbə ruhunun, haqq mübarizəsinin nəticələrini dünyaya bəyan edir. Fəaliyyətinin 20-ci ildönümü ərəfəsində şanlı bayrağımızı Xankəndi, Xocalı, Xocavənd və digər ərazilərdə ucaldan Prezident, Ali Baş Komandan İlham Əliyev xalqımızı bir daha qürurlandırdı, gənclərə müdriklik , qətiyyət, liderlik keyfiyyətləri aşıladı. İDüşünürük ki, bu uğur siyahısını günlərlə sadalasaq bitməz. XXI əsr siyasətçiləri arasında İlham Əliyev kimi uğurlu, xalqını sevən və xalqının əbədi sevgisini qazanan 2-ci bir lider tapmaq da çətindir. O,artıq Azərbaycan xalqının əbədi lideri kimi tarixə həkk olunub. Bütün bunlara görə də İlham Əliyevi əsrin lideri adlandırmaq olar. Biz də Proses.az kollektivi olaraq Ali Baş Komandanı doğum günü münasibəti ilə səmimi qəlbdən təbrik edir, ona bu çətin və şərəfli missiyasında uğurlar arzulayırıq. Doğum gününüz mübarək Azərbaycanın əbədi lideri.
Rəhman Bayramov,
Proses.az-ın direktoru