Şuşanın, Xankəndinin azad olunması qədər mühüm hadisə – Ruslar Qarabağdan gedir

Dünəndən başlayaraq Qarabağda yerləşən Rusiya sülhməramlıları Azərbaycan ərazisini tərk etməyə başlayıb. İlkin olaraq Kəlbəcərdə yerləşən Xudavəng monastırının mühafizəsini təşkil edən sülhməramlı kontingent ölkəmizi tərk etmək üçün hərəkətə başlayıb. Artıq Azərbaycan polisi Xudavəng monastırının mühafizəsini özü təşkil edir.

Bu hadisə çox böyük tarixi bir hadisədir. Bu gün dünya siyasi və hərbi arenasında vəziyyət hər an daha da gərginləşmə istiqamətdə irəliləyir. İran – İsrail münasibətləri ən gərgin həddə çatıb, müharibənin başlaması an məsələsidir. Rusiya – Ukrayna müharibəsi sonu görünməyən bir uçuruma doğru gedir. Fransa başda olmaqla bir çox dövlətlər Ermənistana siyasi və hərbi dəstək verib yenidən Azərbaycanla müharibə aparacaq vəziyyətə gətirməyə çalışır. Belə gərgin bir dönəmdə Rusiya sülhməramlılarının ölkəmizi tərk etməsi elə Şuşanın, Xocalının, Xankəndinin və digər şəhərlərimizin azad olunması qədər böyük tarixi əhəmiyyətə malikdir.

Hələ ki, bu hadisə ilə bağlı nə Azərbaycan nə də Rusiya tərəfindən rəsmi məlumat açıqlanmayıb, amma fakt ortadadır. İlkin olaraq belə qənaətə gəlmək olar ki, Sülhməramlı kontingent ölkəmizi mərhələli şəkildə tərk edəcək.

Bir məsələni də xüsusi vurğulamaq yerinə düşər ki, bu il Azərbaycanda parlament seçkilərinin keçiriləcəyi gözlənilir. Bu baxımdan da ölkə ərazisindən sülhməramlıların çıxarılması Azərbaycan hakimiyyətinin seçki öncəsi qələbəsi kimi qiymətləndirilməlidir. Bundan əlavə Azərbaycanın bəzi müxalifət partiyaları aprel ayının 21-də mitinq keçirəcəklərini elan edib. Həmin mitinqin şüarlarından biri də sülhməramlılar məsələsidir. Bu məqamda sülhməramlı məsələsinin həlli onsuz da mitinq üçün mövzu tapmaqda çətinlik çəkən aksiyaçıların əllərində olan daha bir ”mövzu” da azalmış olur. İndi aksiyaçılar yeni bir “mövzu” axtarışına çıxmalıdır. Birini mən deyim, əgər səsləndirmək cürətləri varsa səsləndirsinlər. Aksiya üçün onlara maddi və mənəvi dəstək verən Fransa və digər dövlətlərdən soruşa bilərlər ki, nə üçün Ermənistanı silahlandırırlar?

Bundan başqa müharibə bitdikdən sonra bir çoxları qələbəmizi həzm edə bilmirdi, rus sülhməramlılarının ölkəmizə girdikdən sonra buranı tərk etməyəcəyini, daimi olaraq Azərbaycanda qalacağını və bir növ Azərbaycanın işlərinə qarışacağını deyirdilər. Bu hadisə həm də onlara bir cavabdır.

Rusiya sülhməramlılarının ölkəmizi tərk etməsinin daha bir önəmi ondan ibarətdir ki son 200 ildə demək olar ki, Azərbaycanın tam ərazisi ilk dəfə olaraq hərbi qüvvələrimizin nəzarətində olacaq. Tarixin xronologiyasına nəzər yetirsək görərik ki son iki əsrdə ölkəmizdə daim hansısa qonşu dövlətin hərbi qüvvələri bu və ya digər şəkildə fəaliyyətdə olub. Artıq həmin xronologiya da sona çatır… Bu qələbə düzgün siyasi xətt yürüdən Ali Baş Komandan İlham Əliyevin və onun arxasında dayanan Azərbaycan xalqının qələbəsidir.

Rəhman Bayramov
Proses.az xəbər portalının baş direktoru

Oxunub: 346