- 17.04.2024 19:00
“Bu, “sevinə bilmərik” deyənlərə də şillə kimi cavab oldu”- Əli Rais
“Rusiyaya məxsus sülhməramlıların Qarabağdan çıxarılması Azərbaycanın, onun Ali Baş Komandanının növbəti uğurudur”
Bu fikri Proses.az-a açıqlamasında jurnalist Əli Rais deyib.
Əli Rais bildirib ki, indiki məqamda belə bir halın baş verməsi Xankəndi, Şuşanın alınması qədər önəmli tarixi hadisədir:
“2020-ci ildə Azərbaycan ordusu 44 günlük Vətən savaşını zəfərlə başa vuranda bəzi şəxslər deyirdilər ki, Xankəndi, Xocalı alınmayıbsa, ruslar torpağımızdadırsa sevinə bilmərik. Təbii ki, bunu deyənlərin çoxu qərəzli, müxtəlif xarici qüvvələrin dəyirmanına su tökən şəxslər idilər. İndi baş verənlər həmin şəxslərə də cavabdır. Artıq heç bir qüvvənin, müxalif şəxsin danışmağa dili yoxdur. Bu, öz yerində. Ancaq önəmli olan tarixin səhifələrinə yazılan şanlı zəfər, dövlətimizin gələcəyi, xalqın rifahı üçün atılan addımlardır. Ümumiyyətlə, çoxumuz bu məsələni bu günün prizmasından baxaraq təhlil edirik və deyirik ki, filankəslərə cavab oldu. Bu, bəsit yanaşmadır. Azərbaycan Prezidenti apardığı balanslı siyasətlə Azərbaycan dövlətinin həm bu günü, həm də gələcəyi üçün çox böyük iş gördü. Bir zamanlar xəyallarımıza belə gəlməyən şeyləri gerçəyə çevirdi.
Xalqı xalq kimi birləşdirdi, qürurunu bərpa etdi, bütünləşdirdi. İndi yaşadığımız hadisələri gələcək nəsillər tarix kimi oxuyacaq, qürur duyacaqlar. Biz də bu günümüzlə qurur duymalı, anın sevincini yaşamalıyıq. Azərbaycanlı olan hər kəs bu hadisələrə sevinməlidir. Özü də diplomatik münasibətlər elə qurulub ki, Azərbaycanın bu hadisələr fonunda hər hansı bir münasibəti korlanmır. Əksinə, bu gün elə Şimal qonşumuzla çox sıx diplomatik münasibətlərimiz var”.
Samir Kərimli
Proses.az