- 23.09.2024 09:40
Ərdoğan Paşinyan Zelenski, Pezeşkianla görüşəcək – Türk Evində
Türkiyə prezidenti Rəcəb Tayyib Ərdoğan BMT Baş Assambleyasında iştirak etmək üçün ABŞ-a səfəri çərçivəsində Vladimir Zelenski, Ermənistanın baş naziri Nikol Paşinyan və İran lideri Məsud Pezeşkian ilə danışıqlar aparacaq.
Publika.az xəbər verir ki, bu barədə “Sabah” qəzeti məlumat yayıb.
“Ərdoğan bir çox dünya liderləri ilə ikitərəfli görüşlər keçirəcək və onların əksəriyyətini Nyu-Yorkda türk diplomatiyasının simvolu olan Türk Evində (bina BMT-nin Nyu-Yorkdakı mənzil-qərargahı ilə üzbəüz yerləşir – red.) qəbul edəcək. Ərdoğanın görüşəcəyi şəxslər arasında İraqın Baş naziri Məhəmməd Şia Əl Sudani, Niderlandın Baş naziri Dik Şuf, BMT-nin Baş katibi Antonio Quterreş, Ermənistanın Baş naziri Nikol Paşinyan, Ukrayna prezidenti Vladimir Zelenski, Küveytin vəliəhdi Şeyx Sabah Xalid Əl-Həməd Əl- Sabah, İran prezidenti Məsud Pezeşkian, Almaniya kansleri Olaf Şolts, Albaniyanın Baş naziri Edi Rama və Serbiya prezidenti Aleksandr Vuçiç var”, – nəşr yazır.
Bundan əvvəl “Anadolu” agentliyi Türkiyə liderinin BMT Baş Assambleyasındakı çıxışının əsas mövzusunun Qəzzadakı vəziyyət olacağını bildirmişdi.