Gürcüstan seçkilərində azərbaycanlıların rolu- Cənubi Qafqaz üçün yeni dövr

Son məlumata görə ( bu yazını yazan zaman açıqlanan) şənbə günü keçirilən parlament seçkilərində hakim “Gürcü arzusu” partiyası 54,24% səslə liderdir.

Bu haqda Gürcüstanın Mərkəzi Seçki Komissiyası məlumat yayıb.

Məlumatda seçki məntəqələrinin 97%-dən çoxunun məlumatlarının əl ilə sayıldığı bildirilir.

MSK-nın məlumatına görə, “Gürcü Arzusu” 54,243%, “Dəyişiklik Koalisiyası” 10,805%, “Birlik – Milli Hərəkat” partiyası 10,07%, “Güclü Gürcüstan” 8,722%, “Gürcüstan üçün Qaxariya” partiyası isə 7,725% səs toplayıb.

Bu seçkilərdə təbii ki, orada yaşayan soydaşlarımız da iştirak etdilər və nəticələrə onların da təsiri az deyil.

Azərbaycanlıların Gürcüstanda keçirilən seçkilərdəki iştirakı və onların həlledici rolu yalnız seçki nəticələrinə deyil, həm də Gürcüstanın gələcək siyasi və regional siyasətinə təsir edir. Gürcüstanda təxminən 300 min azərbaycanlı yaşayır və soydaşlarımız öz yaşadıqları bölgələrdə yüksək seçici fəallığı nümayiş etdirərək ölkənin ümumi siyasi mənzərəsində mühüm yer tuturlar.

Gürcüstanda yaşayan azərbaycanlı seçicilər hakim partiyaya səs verməklə, ölkənin sabitliyinin və ənənəvi dəyərlərin qorunmasında mühüm rol oynadılar. Azərbaycanlı seçicilərin hakim partiyaya verdiyi səs onun ümumi səslərinin 7-8 faizini təşkil edir və bu, seçkilərdə mühüm çəkiyə malik olduqlarını göstərir.

Soydaşlarımız ölkədə qərbpərəst siyasətə qarşı çıxaraq, Gürcüstanın sülh və sabitliyini dəstəklədilər. Gürcüstanda yaşayan azərbaycanlılar ölkənin mövcud siyasi arenasında təkcə say baxımından deyil, həm də öz sosial əhatələri və təsir imkanlarına görə də xüsusi önəm daşıyırlar.

Azərbaycan və Gürcüstan Hökumətləri arasında müdafiə sahəsində əməkdaşlıq haqqında Saziş təsdiq edilib

Azərbaycan və Gürcüstanın ortamövqedən çıxışı

Bu seçkilər həm də Azərbaycanın və Gürcüstanın Ermənistanın regiondakı təxribatlarına qarşı ortaq mövqedə olduğunu göstərdi. Əgər seçki nəticələri fərqli olsaydı və qərbpərəst namizəd qalib gəlsəydi, bu, regionda yeni bir qarşıdurmanın başlanğıcını qoya bilərdi. Belə bir nəticə Qərbin regionu parçalamaq niyyətinə uyğun olaraq, Gürcüstanda ikinci cəbhənin açılmasına gətirib çıxara bilərdi. Lakin azərbaycanlı seçicilər ənənəvi dəyərləri və sabitliyi müdafiə edərək, regionun müstəqilliyinə və birlik ruhuna sadiq qaldılar.

Gürcüstan və Azərbaycan arasında güclü əməkdaşlıq

Azərbaycan-Gürcüstan əməkdaşlığı tarixən regionun sabitliyini təmin edən əsas güclərdən biri olub. Bu gün də bu birlik hər iki ölkəyə siyasi və iqtisadi sahədə güclənmək imkanı yaradır. Gürcüstanın hazırkı hökuməti Azərbaycanla münasibətləri qorumaq və gücləndirmək üçün azərbaycanlı icmasının dəstəyini və əhəmiyyətini dərk edir. Azərbaycanlılar Gürcüstanın iqtisadi və sosial həyatında fəal iştirak edərək, iki dövlət arasında möhkəm körpü rolunu oynayır və həm öz maraqlarını, həm də iki ölkənin birgə maraqlarını müdafiə edirlər.

Azərbaycan və Gürcüstan arasındakı tarixi əməkdaşlığa qısa nəzər salaq:

Enerji sahəsində əməkdaşlıq

Enerji sahəsi Azərbaycan və Gürcüstanın əməkdaşlığında mühüm rol oynayır. Azərbaycanın zəngin enerji resursları Gürcüstan üçün strateji əhəmiyyət daşıyır. İki ölkə birgə enerji layihələri çərçivəsində bir sıra əhəmiyyətli layihələr həyata keçirib, bunlardan ən tanınmışı Bakı-Tbilisi-Ceyhan (BTC) neft kəməri və Bakı-Tbilisi-Ərzurum (BTE) qaz kəməridir. Bu kəmərlər Azərbaycan neftini və qazını Gürcüstan vasitəsilə Avropaya çatdırır və regionun enerji təhlükəsizliyinə mühüm töhfə verir.

Bu əməkdaşlıq həm də Azərbaycan və Gürcüstanın Avropa və digər beynəlxalq bazarlara enerji ixrac etməsi üçün yeni imkanlar açır və hər iki ölkənin iqtisadiyyatını gücləndirir. Azərbaycanın neft-qaz layihələri sayəsində Gürcüstan həm tranzit ölkə olaraq iqtisadi divident əldə edir, həm də enerji təchizatında dayanıqlılıq qazanır.

Azərbaycan-Gürcüstan: Etibarlı tərəfdaş və iqtisadi əməkdaşlıq

Nəqliyyat və infrastruktur layihələri

Azərbaycan və Gürcüstan regionda nəqliyyat və logistika sahəsində də əməkdaşlıq edərək mühüm tranzit xətlərinin qurulmasında birgə çalışır. Bakı-Tbilisi-Qars (BTQ) dəmir yolu layihəsi bu əməkdaşlığın ən uğurlu nümunələrindən biridir. Bu dəmir yolu Asiya ilə Avropanı birləşdirərək Qafqazı beynəlxalq ticarət dəhlizinin əsas hissəsinə çevirir. Bakı-Tbilisi-Qars dəmir yolu Azərbaycan, Gürcüstan və Türkiyə arasında ticarət əlaqələrini gücləndirir və onların Avropa və Asiya ilə daha yaxın əlaqələr qurmasına şərait yaradır.

Eyni zamanda, TRACECA (Avropa-Qafqaz-Asiya nəqliyyat dəhlizi) layihəsi vasitəsilə Azərbaycan və Gürcüstan beynəlxalq ticarətdə daha çox rol oynayır, bu dəhliz Çin və digər Asiya ölkələrinin mallarını Avropa bazarlarına çatdırır.

Təhlükəsizlik və müdafiə əməkdaşlığı

Regionda mövcud təhlükələr fonunda Azərbaycan və Gürcüstan təhlükəsizlik sahəsində əməkdaşlığa böyük əhəmiyyət verir. Bu əməkdaşlıqda hər iki ölkənin ərazi bütövlüyü və suverenliyinin qorunması əsas məqsədlərdən biridir. Həm Azərbaycan, həm də Gürcüstan bir-birlərinin ərazi bütövlüyünü dəstəkləyir və terrorizmə qarşı mübarizədə birlik nümayiş etdirir.

Gürcüstan həmçinin Azərbaycanın NATO ilə əməkdaşlığını dəstəkləyir və Azərbaycanla birgə hərbi təlimlər və təhlükəsizlik sahəsində təcrübə mübadiləsi həyata keçirir. İki ölkə arasında bu sahədə imzalanan razılaşmalar regional təhlükəsizliyə xidmət edir və hərbi-strateji tərəfdaşlığın möhkəmlənməsinə şərait yaradır.

Qayıdaq seçki məsələsinə…

Ekspertlər bildirirlər ki, seçkilərin nəticələri Qərbin Gürcüstanda və ümumilikdə Cənubi Qafqazda yürütmək istədiyi siyasətə böyük zərbə vurdu. Gürcüstanda yaşayan azərbaycanlılar və digər ənənəvi dəyərlərə sadiq vətəndaşlar, Qərbin regionu parçalamaq və müharibə ocağına çevirmək niyyətinə qarşı çıxış edərək, əmin etdilər ki, onların dəstəyi ölkədə sabitliyin təmin olunmasına yönəlib. Yuxarıda da qeyd etdiyimiz kimi bu prosesdə azərbaycanlıların rolu, Gürcüstanın həm daxili, həm də xarici siyasətində Qərbpərəst və ənənəvi dəyərlər arasında seçim etməsinə böyük təsir göstərdi.

Gürcüstan üçün yeni ssenari

Gürcüstan hakimiyyətindən azərbaycanlılara gözlənilən diqqət…

Ümid edirik ki, Gürcüstan hakimiyyəti oradakı soydaşlarımızın problemlərinə daha ciddi yanaşıb, həll etməyə çalışacaq. Gürcüstandakı azərbaycanlılar öz yaşayış şəraitlərinin yaxşılaşdırılması, sosial və iqtisadi hüquqlarının qorunması istiqamətində daha fəal addımların atılmasını gözləyir. Ümid edirik ki, Gürcüstan hakimiyyəti bundan sonra bu məsələlərə daha həssas yanaşacaq və azərbaycanlıların ölkədəki mövqelərini gücləndirmək üçün əlavə addımlar atacaq.

Ermənistanın alacağı dərs…

Azərbaycan və Gürcüstanın bu siyasi mövqeyi, Ermənistan üçün də bir dərs olmalıdır. Azərbaycanın və Gürcüstanın regionda birlik ruhunu qoruyaraq fəaliyyət göstərməsi ümid edirik ki, Ermənistanı da sülh və sabitliyə yönəlik addımlar atmağa təşviq edəcək. Əgər Ermənistan regionun bir hissəsi kimi müstəqil qərarlar qəbul etməyə başlasa, Qafqazda sabit və davamlı sülh təmin edilə bilər.

Gürcüstanda azərbaycanlıların dəstəyi ilə əldə edilən seçki nəticələri, Azərbaycan-Gürcüstan dostluğunun, regionda sabitliyin qorunması və ənənəvi dəyərlərin müdafiəsi üçün əhəmiyyətini bir daha sübut etdi. Bu birlik həm Azərbaycan, həm də Gürcüstan üçün strateji əhəmiyyət daşıyır və gələcəkdə də bu iki ölkənin regiondakı gücünü və təsirini artırmağa xidmət edəcək.

Əli Rais,

Musavat.com