Tüstü bu rəngdə çıxırsa 1000 manata yaxın xərci var – Sürücülərin diqqətinə!

Avtomobildə diqqət edilməsi vacib olan nüanslardan biri də antifrizdir. Mühərrikin daim yüksək temperaturlarda işləməsini nəzərə alsaq onun soyuması üçün antifrizin keyfiyyəti, miqdarı, daimi nəzarət mühüm rol oynayır.

Antifriz nədir?

Antifriz avtomobil mühərrikində və soyutma sistemlərində istifadə olunan xüsusi mayedir. Onun əsas funksiyası mühərrikin həddindən artıq qızmasının və donmasının qarşısını almaqdır. Antifriz, mühərrikin temperaturunu sabit saxlayaraq onun daha effektiv işləməsinə kömək edir. Antifriz həmçinin korroziyanın və pasın yaranmasının qarşısını alaraq mühərrikin ömrünü uzadır. Soyuq havalarda suyun donmasını gecikdirir, isti havalarda isə qaynamanın qarşısını alır. Beləliklə, antifriz mühərriki ekstremal hava şəraitlərində qorumaq üçün vacib rol oynayır.

Antrfriz niyə azalır?

Antifriz azaldıqda bunun bir neçə səbəbi ola bilər. Əsas səbəblərdən biri sızmalardır. Mühərrik sistemi və ya radiator borularındakı, kipgəclərdəki ( Qalovka prokladka ) və ya su nasosundakı sızmalar antifrizin azalmasına səbəb ola bilər. Həmçinin, mühərrikdəki baş kipgənin zədələnməsi nəticəsində antifriz yanma kamerasına sızıb, buxarlanaraq yox ola bilər.

Başqa bir səbəb antifrizin öz tərkibinin və xüsusiyyətlərinin zamanla dəyişməsidir. Bu zaman o, buxarlanaraq yox ola bilər. Həmçinin, mühərrikin həddindən artıq qızması da antifrizin buxarlanmasına və azalmasına gətirib çıxara bilər. Əgər antifriz tez-tez azalırsa, problemi araşdırmaq və həll etmək üçün mütləq ustaya müraciət etmək məsləhətdir.

Anfriz necə ölçülür?

Ev şəraitində antifrizin azalıb-azalmadığını müəyyən etmək ilk olaraq, mühərrik tam soyuduqdan sonra (çünki isti halda təhlükəli ola bilər), antifriz çəninin səviyyəsini yoxlayın. Antifriz çəni adətən şəffaf olur və üzərində “minimum” və “maksimum” işarələri yerləşir. Əgər səviyyə minimum həddən aşağıdırsa, antifriz azalıb.

Daha sonra mühərrikin və radiatorun ətrafını vizual olaraq yoxlayın. Boruların, kipgəclərin və digər birləşmə yerlərinin ətrafında yaş ləkələr və ya qurumuş maye izləri varsa, bu, sızmanın əlaməti ola bilər. Eyni zamanda mühərrik ətrafında və ya avtomobilin alt hissəsində yaş izləri və ya yaş qalıqlar axtarın.

Tüstünün rəngi dəyişibsə – Təhlükə var

Tüstüdən antifriz itkisini müəyyən etmək mümkündür. Əgər mühərrik yanma kamerasına antifriz sızdırırsa, bu, avtomobilin səsboğucusundan çıxan tüstünün rəngində özünü göstərə bilər. Normalda səsboğucu tüstüsü rəngsiz olmalıdır. Lakin antifriz mühərrikdə yananda, ağ rəngdə tüstü əmələ gələ bilər. Üstəlik tüstüdən şirin qoxu gəlir. Əgər ağ tüstü müşahidə edirsinizsə və tüstü kəskin artırsa, bu, “qalovkanın proqladkası”nın zədələnməsi və ya antifrizin mühərrikdə yanması nəticəsində ola bilər. Belə halda dərhal problemi yoxlatmaq üçün mütəxəssisə müraciət etmək tövsiyə olunur.

Antifriz azalıb, nə qədər xərcim çıxacaq?

Antifriz sistemindəki problemlərin təmiri xərcləri problemə görə dəyişir. Əgər məsələ sadəcə antifriz səviyyəsinin azalmasıdırsa və sızma yoxdur, bu halda yalnız antifriz əlavə etməklə minimal xərc çəkə bilərsiniz (adətən bir neçə on manat civarında).

Lakin sızma varsa və ya ciddi komponentlərin (məsələn, su nasosu, radiator, baş kipgə) dəyişdirilməsi tələb olunursa, xərclər əhəmiyyətli dərəcədə arta bilər. Su nasosunun və ya kipgələrin dəyişdirilməsi 100-300 manat arasında, radiator təmiri və ya dəyişdirilməsi isə 200-500 manata başa gələ bilər. Əgər baş kipgə zədələnibsə, bu daha mürəkkəb və bahalı bir təmir sayılır, xərclər 500 manatdan yuxarı qalxa bilər.

Xərc dəqiqliyi işin həcminə, istifadə olunan ehtiyat hissələrinin keyfiyyətinə və avtomobilin markasına bağlıdır. Təmirdən əvvəl dəqiq qiymət təklifi almaq üçün etibarlı bir mexanikə müraciət etmək məsləhətdir.

Milli.az