“Filmdə yalançı başdaşını ziyarət elə, tezliklə həqiqətə çevrilsin” – VİDEO

Yazıçı Varis Yolçuyevin bir neçə gün əvvəl vəfat edən aktyor Azər Baxşəliyevlə bağlı paylaşımı diqqət çəkib.

Yazıçı aktyorun rol aldığı ekran işində canlandırdığı Ağsaqqal obrazının Azər Baxşəliyev yazılan qəbirə baxdığı fotonu paylaşaraq bu sözləri yazıb:

“İnsanlar öz aqibətlərini bəzən özləri gətirmirlərmi?

Haçansa deyilən bu müdrik kəlam bu fotoda necə də sübut olunur.

Sən bir filmdə öz yalançı başdaşını ziyarət elə. Və tezliklə bu yalançı başdaşı həqiqi başdaşına çevrilsin”- , deyə o yazıb.

Sözügedən foto “Bozbash Pictures”in səhnəciklərindən birinə aiddir. Həmin səhnədə molla obrazında olan Ağsaqqal ölən şəxsin yaxınlarını qıcıqlandırır. Mərhumun qohumları Ağsaqqalın arxasıyca qaçır. Bu zaman obrazın yanından keçdiyi qəbirlərin üzərində ekran işində rol alan İlkin Həsəni, Ramil Babayev, İlkin Misgərli və digər aktyorların fotoları və adı görünür. Ağsaqqal digər qəbirlərin yanından qaçaraq keçsə də, Azər Baxşəliyev yazılan qəbrin yanından keçərkən geri qayıdır və başdaşına baxır.

Qeyd edək ki, Azər Baxşəliyev 3 iyul 1985-ci ildə anadan olub. O, “Bozbash Pictures”in Ağsaqqal və Əzəmət obrazları ilə tanınmağa başlayıb. ATV telekanalında çalışıb.

A.Baxşəliyev böyrək çatışmazlığından əziyyət çəkirdi. 2025-ci il yanvarın 2-də koma vəziyyətində ATU-nun Tədris Cərrahiyyə Klinikasının Reanimasiya şöbəsinə yerləşdirilib. Ardınca mediada ölüm xəbərləri yayılıb. Daha sonra bu xəbər təkzib olunub və ürək fəaliyyətinin bərpa edildiyi, süni tənəffüs aparatına qoşulduğu bildirilib.Yanvarın 5-də uzun sürən xəstəlikdən sonra vəfat edib. O, yanvarın 5-də “Qurd qapısı” qəbiristanlığında dəfn olunub.

Ölkə.Az