“Evdə oturub, işıqları söndürüb, saç yolmuram”

Əməkdar artist Sənubər İsgəndərli gənc qalmasının sirrini açıqlayıb.

“Pərvizə görə” proqramında qonaq olan aktrisa heç bir pəhriz saxlamadığını deyib:

“Heç bir pəhriz saxlamıram. Gənclik illərimdə daha çox pəhriz saxlayırdım. İndi ümumiyyətlə yoxdur. Sadəcə, öz qoyduğum qayda-qanunlarım, həyat tərzim var ki, bu olursa, bu olmaz. Olmazlarım da var, lakin əvvəlkinə görə daha azdır”.

Xoşbəxtlikdən danışan aktrisa bunları əlavə edib:

“Məncə, yüz faiz xoşbəxt insanlar ruhi xəstəxanada yatırlar. 100 faiz xoşbəxtlik həyatda yoxdur. Büdrəmələr, səhvlər, gözəl, uğursuz günlər var. Yaxşı günlərim də, ruhdan düşdüyüm anlar da olub. Qadın kimi nisbət götürəndə xoşbəxt qadınam. Ruhdan düşdüyüm vaxtlarda yardımım olur, doğmalar həmişə dəstəkdir. Psixoloqların sözü var, deyirlər, sən özün özünə kömək edə bilərsən. Burada haradasa həqiqət var. Ruhdan düşdüyüm anlarda gözəl musiqi qoyub onu dinləyirəm. Birinci mahnıya köklənməsəm də, ikinciyə yavaş-yavaş fokuslanıram. Gözəl şeylər düşünürəm, başımı nə iləsə qatıram, harasa gedirəm. Evdə oturub, işıqları söndürüb, saç yolmuram. Çünki daha optimistəm”. (Axşam.az)