Axundov kitabxanasında xaos yaşanır?- Direktor müavinindən AÇIQLAMA

Axundov adına Milli kitabxananın əməkdaşlarından redaksiyamıza şikayət daxil olub.  Şikayət edən əməkdaşlar bildirirlər ki, kitabxana rəhbərliyi Kərim Tahirov və müavini Ədibə İsmayılova iclas zamanı işçiləri təhqir edir, əlavə işlə yükləyirlər.

Onlar qeyd edir ki, kitabxanada ali təhsilli ixtisaslı kadrlar fəhlə əvəzi işlədilir, kitab daşıdılır, normadan artıq işlədilirlər.

Onu da qeyd edək ki, bu barədə sosial şəbəkədə bir neçə böyük səhifə tərəfindən oxşar şikayət məktubları paylaşılıb.

Məlumat üçün bildirək ki, Kərim Tahirov 20 ildir kitabxananın direktorudur.

Musavat.com-un əməkdaşı şikayətlə bağlı mövqe almaq üçün adı hallanan Ədibə İsmayılova ilə əlaqə saxlayıb.

O, yayılan məlumatları təkzib edib. Ə. İsmayılova bildirib ki, onlarda elə iclas olmayıb:

“Bəlkə, kimsə qərəzli yazır. Bu barədə direktora da məlumat verəcəyəm. Ola bilsin ki, kimsə qəsdən belə bir iş tutub. Biz kimi fəhlə kimi işlədirik ki? Burada hamı ali təhsilli kitabxanaçılardır, kabinetində oturub işini görür. Şikayətlər anonim olduğuna görə qərəzlidir”.