“Cəmi 3-4 min pul yığılıb, maşın da hədiyyə edilməyib” – “Uçan taksi”nin sürücüsü – Video

Cəmi 3-4 min pul yığılıb. Maşın da hədiyyə edilməyib. Yalan söhbətdir”.

“Qafqazinfo” xəbər verir ki, bunu Bakıda ötən həftə BYD avtomobili ilə dəhşətli qəza törədən sürücü Anar Nəcəfov kart hesabına yüksək məbləğdə pul toplanması ilə bağlı ​danışarkən deyib.

O, xəstəxanadan video paylaşaraq əsəbi şəkildə bildirib ki, kartına 90 min manat pul yığılmayıb: “O kart pulları başqalarına gedə bilər, bizim karta gəlməyib”.

Qeyd edək ki, sözügedən qəza bir neçə gün əvvəl Heydər Əliyev prospektində baş verib. “Bolt” taksi şirkətinə məxsus avtomobilin sürücüsü idarəetməni itirib, arakəsməni yararaq prospektdə hərəkətdə olan “Ford”a dəyib və yolun bu biri tərəfinə düşüb. Hadisə nəticəsində sürücü və sərnişini xəsarət alıb.

Qəzadan sonra sosial şəbəkələrdə sürücüyə kömək məqsədilə kart hesabı paylaşılaraq kampaniya başladılıb. Lakin bu, vətəndaşlar tərəfindən birmənalı qarşılanmayıb. Belə ki, qəzaya səbəb olan və heç bir ağır xəsarət almayan sürücüyə pul yığılması sərt tənqid olunub.