Gənclər arasında eynicinsli münasibətlər artıb – AÇIQLAMA

Son illərdə LGBT nümayəndələrinin sayında nəzərəçarpacaq artım müşahidə olunur. Xüsusən də sosial media bu qrup insanlara özlərini açıq şəkildə ifadə etmək imkanı verir. Bu isə həm cəmiyyətdə mövzunun daha çox müzakirə olunmasına, həm də fərqli yanaşmaların ortaya çıxmasına səbəb olur.

Maraqlıdır ki, son dövrdə LGBT-çilərin sayının artmasının əsas səbəbləri nələrdir? Artım tendensiyası daha çox hansı yaş qruplarında müşahidə olunur və bunun psixoloji-sosial izahı necədir?

Mövcud suallarla bağlı Sfera.az-a açıqlama verən psixoloq Ülkər Məhərrəmova son illərdə LGBT nümayəndələrinin sayında nəzərəçarpacaq artımı mədəni və psixoloji amillərlə əlaqələndirib:

“Əslində bu, artıq sosial qəbul məsələsinə çevrilib. Çünki həm media, həm də sosial şəbəkələr bu mövzuda daha çox informasiya və material təqdim edir, eyni zamanda insanların düşüncələrini daha rahat şəkildə ifadə etmələrinə imkan yaradır. İnsanlar fikirlərini sərbəst şəkildə dilə gətirməklə həm də daha çox dəstək tapırlar”.

Psixoloq söylədi ki, insanlar artıq öz kimliklərini qoruyaraq təhlükəsiz şəkildə ifadə edə bilirlər:

“Xüsusilə gənclər arasında bu daha geniş yayılıb. Çünki onlar təhlükəsiz hesab etdikləri mühitlərdə özlərini ifadə edirlər. Məsələn, məktəblərdə, yeniyetmələr və gənclərin toplaşdığı platformalarda bu mövzuda müxtəlif maarifləndirmə işləri aparılır. Orada onlar duyğu və hisslərini açıq şəkildə ifadə edir, qəbul olunur və dəstək taparaq özlərini rahat hiss edirlər. Üstəlik, artıq hər yerdə onlara dayaq ola biləcək mühit mövcuddur. Bundan başqa, insanlar psixoloji baxımdan da daha sabit bir vəziyyət formalaşdırır, haqlı olduqlarını düşünürlər. Çünki əvvəllər gizlədilən mövzular indi açıq şəkildə ifadə olunur. Qanunvericilikdə qəbul olunması, maarifləndirmənin genişlənməsi və sosial şəbəkələrdə sərbəst müzakirə imkanı nəticəsində duyğular artıq daha rahat dilə gətirilir. Gizlədilən məqamlar indi üzə çıxır”.

Ü.Məhərrəmova sosial mediada bu proseslərə dəstəyin daha güclü olduğunu qeyd edib:

 “Gənclər kimliklərini orada daha rahat ifadə edir, açıq və aşkar şəkildə ortaya qoyurlar. Amma Azərbaycan müsəlman ölkəsi olduğuna görə, bu mövzular həmişə müsbət qarşılanmır. Əvvəllər gizli olan hallar indi aşkarlandığı üçün bəzən kəskin reaksiyalara səbəb olur. Bu məsələnin psixoloji, hətta patoloji tərəfləri də mövcud ola bilər. Lakin gənclər arasında artan dəstək və təsir nəticəsində artıq bir “seçim” kimi qəbul edilməyə başlanır. Dünyanın bir çox ölkəsində təhlükəsiz hesab edildiyinə görə bu proses getdikcə daha da genişlənir”.

Müsahibimiz gənclər arasında, həm qızlarda, həm də oğlanlarda eyni cinsli münasibətlərə marağın və bu yöndə seçimlərin artdığını da vurğuladı:

“Mənim praktikada ən çox rast gəldiyim hallar göstərir ki, belə düşüncələrə meyil edən gənclər ailədə dəyər görməyən, dinlənilməyən və psixoloji boşluq yaşayan şəxslərdir. Onlar sosial şəbəkələrdə daha çox anlaşma və dəstək tapdıqları üçün özlərini orada güvənli hiss edirlər. Elə bu da onların seçimlərinin həmin istiqamətə yönəlməsində mühüm rol oynayır”.