Formula-1 üzrə Qran-prinin qalibi bəlli oldu

Bakıda təşkil olunan Formula-1 üzrə Azərbaycan Qran-prisinə bu gün yekun vurulacaq.

Əsas yarış saat 15:00-da start götürəcək.

Ötən gün sıralama turunda “Red Bull” pilotu Maks Ferstappen birinci olub. “Uilyams”dan Karlos Sayns ikinci, “Reysinq Bulls”dan Liam Louson üçüncü yeri tutub. “Mercedes”dən Andre Kimi Antonelli dördüncü, onun komanda yoldaşı Corc Rassell beşinci pillədə qərarlaşıb.

Bu gün “Formula 2″də də mübarizəyə yekun vurulacaq. İkinci dərəcəli pilotların əsas yarışı saat 11:00-da başlayacaq. Burada sıralama turunda ən yaxşı nəticəni “Dams Lukas Oil”dən Cek Krouford göstərib.

20 döngə, 51 dövrədən ibarət olan Bakı treki ümumilikdə 306,049 km məsafəni əhatə edir. Paytaxtdakı ilk yarış Avropa Qran-prisi kimi 2016-cı ildə baş tutub. Sonrakı səkkiz turnir Azərbaycan Qran-prisi adlanıb.

2016-cı ildə almaniyalı Niko Rosberq yarışı hamıdan tez tamamlayıb. Növbəti illərdə müvafiq olaraq Daniel Rikkardo (Avstraliya), Lyuis Hemilton (Böyük Britaniya), Valtteri Bottas (Finlandiya), Serxio Peres (Meksika) və Maks Ferstappen (Niderland) treki birinci pillədə başa vurublar. 2023-cü ildə isə Peres ikinci dəfə Bakıda qalib gəlib. 2024-cü ildə “Maklaren”dən Oskar Piastri bütün rəqiblərini qabaqlayıb. 2020-ci ildə koronavirus pandemiyası səbəbindən paytaxtımızda yarış təşkil olunmayıb.

Azərbaycan Qran-prisinədək “Maklaren” pilotu Oskar Piastri 324 xalla liderdir. Onun komanda yoldaşı Lando Norris (293 xal) ikinci, “Red Bull”dan Maks Ferstappen (230 xal) üçüncüdür.

Konstruktorlar Kubokunda isə “Maklaren” liderdir – 617 xal. “Ferrari” ikinci (280 xal), “Mersedes” (260 xal) üçüncü pillədə qərarlaşıb.

***

Bakıda təşkil olunan Formula-1 üzrə Azərbaycan Qran-prisində əsas yarış başlayıb.

Mübarizəyə saat 15:00-da start verilib.

***

Formula-1 üzrə Azərbaycan Qran-prisinin qalibi bəlli olub.

“Redd Bull” pilotu Maks Ferstappen bütün rəqiblərini qabaqlayıb.

Niderlandlı sürücü ikinci dəfə Bakıda qələbə sevinci yaşayıb.

O, daha əvvəl 2022-ci ildə də Azərbaycan Qran-prisində treki birinci pillədə başa vurub.