Qızı mərhum Əməkdar artist Xanım Qafarovanın məzarı başında nələri etiraf etdi?

“Arzunun vaxtı” verilişi bu dəfə mərhum teatr və kino aktrisası, Əməkdar artist Xanım Qafarovaya həsr olunub.

Verilişin müəllifi və aparıcısı Arzu Kəlbi aktrisanın qızı Gövhər Gülmalıyeva ilə birlikdə onun məzarını ziyarət edib.

Söhbət zamanı Gövhər Gülmalıyeva anası ilə bağlı xatirələrini bölüşərək bildirib ki, Xanım Qafarova həm zəhmətkeş, həm də övladı üçün hər cür çətinliyə dözən bir qadın olub.

“Anam məni çox sevirdi, amma onunla xatirələrimiz azdır. İşinin çoxluğu səbəbindən onu əsasən gecələr görə bilirdim, bəzən isə heç görə bilmirdim. Demək olar ki, ana qayğısı görməmişəm. Məni nənəm və xalam böyüdüb”, – deyə Gövhər Gülmalıyeva qeyd edib.

O, anasının vəfatından sonra keçirdiyi ağır günləri belə xatırlayıb:

“Anam dünyasını dəyişdikdən sonra nənəm və xalamla yaşamağa başladım. Təəssüf ki, nənəmin də başına bədbəxt hadisə gəldi. O yıxıldı və əməliyyata baxmayaraq, dünyasını dəyişdi. Jurnalistika fakültəsinə qəbul olmaq üçün qabiliyyət imtahanı verirdim. Elə həmin gün xalamın beyninə qan sızdı. Nənəmin cənazəsi təzəlikcə evdən çıxmışdı ki, xalamı da itirdim. Hər ikisi mənim jurnalistikaya qəbul olmağımı çox arzulayırdı, amma bunu görmək onlara qismət olmadı”.

Daha ətraflı Baku TV-nin reportajında: