“Qarabağ” “Atletik Bilbao” ilə oyunundakı təxribata görə UEFA-ya müraciət etdi

Xəbər verdiyimiz kimi, UEFA Çempionlar Liqasının Liqa mərhələsinin üçüncü turu çərçivəsində keçirilən “Atletik Bilbao” -“Qarabağ” matçı zamanı bir qrup azarkeş tərəfindən separatçı rejimin bayrağı açılıb. Bununla bağlı yayılan görüntülər narazılıqlara səbəb olub.

Baş verən hadisə ilə bağlı Manset.az-ın sorğusuna “Qarabağ” Futbol Klubunun mətbuat katibi Anar Hacıyev bildirib ki, oyundan öncə Azərbaycana qarşı bu tip təxribat olub.

“Oyundan bir gün əvvəl də biz plakatların yapışdırılması ilə bağlı rəsmi şəkildə “Atletik Bilbao” klubuna, klub vasitəsilə oradakı orqanlara, polisə müraciət etmişdik. Eyni zamanda oyunun təşkilatçılığında rolu olan UEFA nümayəndələri ilə də bu barədə müzakirələr aparılmışdı. Onlara məsələlər çatdırılmışdı. Yəni bununla bağlı biz tərəfdən bütün lazımi addımlar atılmışdı və bütün baş verə biləcək bu tip proseslər onlar tərəfindən kontrol olunmalı idi. Amma təəssüf ki, yenə də belə xoşagəlməz görüntülər ortaya çıxdı”.

Anar Hacıyev qeyd edib ki, oyunun gedişatında baş verən hadisə ilə bağlı da dərhal fotolar və video görüntülər lazımi yerlərə göndərilib və bu məsələnin narahatlıq yaratdığı bildirilib.