Quzu əti daha da bahalaşacaq – 40 manat və daha yüksək…

Xəbər verdiyimiz kimi, Azərbaycanda quzu əti kəskin bahalaşıb.

Milli.Az-ın məlumatına görə, əvvəl bir kiloqramı 22-23 manata satılan quzu əti hazırda 32 manata təklif olunur.

Bəs, bu bahalaşmanın səbəbi nədir? Yaxın günlərdə daha da bahalaşa bilərmi?

Məsələ ilə bağlı kənd təsərrüfatı eksperti Vahid Məhərrəmov Milli.Az-a açıqlamasınaa bildirib ki, hələ Milli Məclisdə quzu ətinin kəsiminə qadağa qoyulanda proqnozlaşdırılırdı ki, yaxın aylarda quzu ətinin qiyməti kəskin artacaq.

Ekspertin sözlərinə görə, tətbiq olunan qadağa bir çox sahibkarlara əlavə xərclər yaradıb:

“Bu qadağanın tətbiqi bir çox sahibkarların fəaliyyətinə əlavə xərclər gətirib. Belə vəziyyətlərdə sahibkarlar, xüsusən də heyvan kəsimi ilə məşğul olanlar, nəzarət orqanlarına müxtəlif formalarda ödənişlər etməyə məcbur olurlar. Bu səbəbdən quzu ətinin qiymətinin artmı gözlənilən idi”.

Vahid Məhərrəmov əlavə edib ki, qiymət artımını sürətləndirən digər əsas amil son aylarda heyvanlar arasında geniş yayılmış dabaq xəstəliyidir:

“Dabaq xəstəliyi nəticəsində on minlərlə heyvan tələf olub, bir çoxu isə bala salıb. Nəticədə heyvanların ümumi sayı azalıb və bu, bazarda ət təklifini məhdudlaşdırıb. Biz yaxın zamanlarda quzuların sayının azaldığını görəcəyik. Yəni biz bundan sonrada quzu ətinin qiymətində kəskin artım gözləyirik”.

Ekspert hesab edir ki, Yeni il ərəfəsində quzu ətinin qiyməti 40 manata qədər arta bilər. Bildirib ki, sonrakı mərhələlərdə də daha yüksək qiymət təklif olunacaq:

“Hazırda Monqolustan və digər ölkələrdən gətirilən ət quzu deyil, əsasən qoç ətidir. Onun kiloqramı təxminən 22-23 manata satılır. Lakin yerli quzu ətinin qiyməti daha yüksəkdir”.

Həmsöhbətimiz quzu ətinə tələbatın yüksək olaraq qalacağını düşünür:

“Xüsusilə imkanlı şəxslər və sahibkarlar bu əti həm özləri, həm də yaxınları üçün alırlar. Tələb yüksək, təklif azdırsa, bu, qiymət artımının davam edəcəyini göstərir”.