Bu halda kirayə qalanlar mənzil sahibi olurlar – AÇIQLAMA

Bu gün ev sahibi olmaq bir çox insanın əsas istəklərindən biridir. Lakin maliyyə imkanlarının məhdudluğu bu arzunun reallaşmasında kreditlərin rolunu daha da önə çıxarır. Mənzil almaq üçün kredit götürmək isə sadə proses deyil, çünki uzun illər davam edən öhdəlik tələb edir və bunun sərfəliliyi hər kəsi düşündürür.

Milli.Az xəbər verir ki, son illərdə vətəndaşların mənzil əldə etməsini asanlaşdırmaq üçün müxtəlif mexanizmlər tətbiq olunub. Dövlət və bank ipotekaları, daxili kreditlər, “satmaq öhdəliyi ilə kirayə” sistemi və digər alternativlər.

Mövzu ilə bağlı daşınmaz əmlak eksperti Ramil Osmanlı bu seçimlər arasında ən münasib variantın hansını təşkil etdiyini açıqlayıb:

Onun sözlərinə görə, mənzil sahibi olmaq üçün ən əlverişli yol ipoteka proqramıdır:

“Xüsusilə güzəştli ipoteka daha sərfəlidir, çünki illik faiz dərəcəsi cəmi 4 faizdir. Bu kreditə çıxış imkanları nisbətən çətin olsa da, indiki şəraitdə mənzil əldə etmək üçün ən uyğun mexanizm məhz budur”, – deyə o bildirib.

Məsələ ilə bağlı Azərbaycan Qiymətləndiricilər Cəmiyyətinin sədri Vüqar Oruc bildirib ki, eyni zamanda Mənzil İnşaatı Dövlət Agentliyi xətti ilə təqdim olunan ucuz evlər layihəsi var. Güzəştli ipoteka şərtlərinə uyğun, satmaq öhtəliyi ilə mənzillərin uzun müddətli kirayə verilməsi layihəsi var ki, burda ilkin ödəniş mövcud deyil:

“Kirayə ödənişi ödəməklə mənzil sahibi olmaq bir çox vətəndaşlarımız üçün uyğundur. Çünki bu gün kirayə bazarına müraciət edənlər həddən artıq çoxdur. Əgər həmin layihədə söhbət binalardan gedirsə, vətəndaşlar kirayə ödəyərək mənzil sahibi ola bilərlər. Lakin satmaq mexanizmi ilə kirayə öhtəliyinin xarakterik cəhətlərindən biri də mənzillərin müəyyən olunan ərazilərdən təklif olunmasıdır”.

Əmlak ekspertləri isə təklif olunan faizlərin çox sərfəli olduğunu qeyd edirlər.