Sərxoş halda ağır qəza törədən tanınmış şəxs imiş

Sentyabrın 15-nə keçən gecə Mingəçevir şəhəri Heydər Əliyev prospektində baş vermiş dəhşətli yol qəzası ilə bağlı bəzi faktlar üzə çıxıb.

PROSES.AZ “Qafqazinfo”ya istinadən xəbər verir ki, “Lexus” markalı avtomobillə ağır qəza törədən 1986-cı il təvəllüdlü Elmar Allahverdiyev tanınmış şəxsdir. Belə ki, E.Allahverdiyev keçmiş hərbçidir və ali təhsilli kəşfiyyatçı olub.

Aprel döyüşlərində iştirak etmiş Elmar Allahverdiyev “Tərtər işi”ndə ermənilərə casusluq ittihamı ilə həbs edilib və dəhşətli işgəncələrə məruz qalıb. Bir müddət həbsdə saxlandıqdan sonra azadlığa buraxılan E.Allahverdiyev daha sonra Vətən müharibəsində iştirak edib və bir sıra medallarla təltif edilib.

İlkin araşdırmalar zamanı məlum olub ki, hadisə vaxtı Elmar Allahverdiyev spirtli içkinin təsiri altında olub. Onun avtomobili yüksək sürətlə idarə etməsi də müəyyənləşib.

Həmçinin o da məlum olub ki, qəzada vəfat edən 1994-cü il təvəllüdlü Rahimə Allahverdiyeva Elmar Allahverdiyevin həyat yoldaşıdır. Hadisə nəticəsində onun 2 övladı və digər qohumu da müxtəlif xəsarətlər alıb.

Faktla bağlı Mingəçevir Şəhər Polis Şöbəsində cinayət işi başlanıb.