Dövlət Turizm Agentliyi 150 nəfərə 3 ton araq alıb? – SENSASİON İDDİALAR və AÇIQLAMA

Sosial şəbəkələrdə Dövlət Turizm Agentliyinin 150 nəfər qonaq üçün 3 ton ərik arağı alması ilə bağlı məlumatlar paylaşılıb.

Proses.az xəbər verir ki, paylaşımlarda Agentliyin bu qədər arağı hansı səbəbdən alması müzakirə edilir, qurum tənqid olunur. Paylaşım edən şəxslər hesab edirlər ki, Agentlik bu kimi hallarla pul silir, dövlətə zərər vurur.
Məsələ ilə bağlı Dövlət Turizm Agentliyi də açıqlama yayıb. Açıqlamada aşağıdakılar bildirilir:
“Qərbi Azərbaycan mətbəxinin təqdimatının təşkili ilə bağlı xidmətlərin satın alınması” adlı tenderlə bağlı sosial şəbəkələrdə yayılan məlumatlar həqiqəti əks etdirmir. Milli kulinariyamızın təbliğinin bir hissəsi kimi 2023-cü ilin dekabrın 30-da elan edilən “Qərbi Azərbaycan mətbəxinin təqdimatının təşkili ilə bağlı xidmətlərin satın alınması” adlı tenderlə bağlı sosial şəbəkələrdə yayılan məlumatlar həqiqəti əks etdirməyərək süni ajiotaja və yanlış anlaşılmaya səbəb olub.
Tenderdə qeyd olunan balıq, kərə yağı, turşu, ərik arağı və digər kulinariya məhsullarının satın alınması xidməti ilə bağlı yayılan məlumatlar düzgün anlaşılmayıb, ölçülər kiloqramla və litrlə göstərilsə də, təəssüf ki, “ton” olaraq başa düşülüb.
Qeyd edək ki, Dövlət Turizm Agentliyinin fəaliyyətinin əsas prinsiplərindən biri daim ictimaiyyətə və mediaya açıq olmaqdır. Hər zaman olduğu kimi, bir daha media nümayəndələrindən Dövlət Turizm Agentliyinin fəaliyyəti ilə bağlı istənilən məlumatın dəqiqləşdirilməsi üçün ilk növbədə Agentliyə müraciət edilməsini xahiş və tövsiyə edirik”.

Proses.az