Mədəniyyət Nazirliyi Aygün Bəylərin ölümünü niyə gizlətdi?- Qurumda EQO SAVAŞI

Xəbər verdiyimiz kimi Azərbaycanın Əməkdar artisti Aygün Bəylər dünyasını dəyişib.

Aygün xanımın dünyasını dəyişməsi xəbəri dünən sosial şəbəkələrdə bir neçə dəfə yayıldı, silindi. Hətta deputatlar, ( məsələn, Fazil Mustafa) digər ictimaiyyət nümayəndələri də bu xəbərin əsirinə çevrildilər. Ancaq nədənsə Mədəniyyət Nazirliyi əlində rəsmi və dəqiq məlumat olduğu halda bu informasiyanı gizli saxlamağa üstünlük verdi. Bir müğənninin ölüm xəbəri hansısa siyasi və ya sosial ajiotaja səbəb ola bilməz.

Bəs belə olan halda Mədəniyyət Nazirliyi nə üçün bu xəbəri gizlətdi?

Proses.az-a daxil olan məlumata görə, xəbəri ilk olaraq nazirliyin hər hansı bir sıravi əməkdaşı yayıb. Daha sonra ondan vəzifəcə yüksək olan nazirliyin işçiləri bu xəbəri təkzib ediblər. Eqo savaşı və ya digər buna bənzər məqamlar ölkənin sevilən sənətkarının ölüm xəbərinin bu cür yayılmasına səbəb oldu. İnsanların hisləri ilə oynanıldı, Aygün Bəylər kimi sənətkara isə son borcumuzu layiqincə yerinə yetirə bilmədik.

İndi də saat 10-u keçsə də, hələ də Aygün xanımın harada dəfn olunması ilə bağlı nazirliyin rəsmi açıqlaması yoxdur. Yenə də insanlar gözləyir və yenə də sosial şəbəkələrdə müxtəlif versiyalar səsləndirilir.

Nazirlik isə nəyisə və ya kimisə gözləyir…

Cavid Hüseyn,
Proses.az