- 10.01.2024 16:58
Kitabsevərlər yenidən “Hophopnamə” Kitab Mərkəzinə toplaşacaq – SƏRGİ
![Kitabsevərlər yenidən “Hophopnamə” Kitab Mərkəzinə toplaşacaq – SƏRGİ](https://proses.az/wp-content/uploads/2024/01/mil-mugan.jpg)
Yanvarın 12-də Sabirabad rayonunda “İkinci Həyat” adlı kitab sərgisi keçiriləcək. Bununla bağlı Proses.az-a Mil-Muğan Regional Mədəniyyət İdarəsinin mətbuat xidməti məlumat verib. Qeyd edək ki, Sərgi “Hophopnamə” Kitab Mərkəzində keçiriləcək. Bu mərkəz Azərbaycan bölgələrində yaradılan ilk müasir kitab mərkəzidir. Mil-Muğan Regional Mədəniyyət İdarəsinin təşəbbüsü ilə yaradılan mərkəzdə kitabsevərlər Azərbaycan və dünya ədəbiyyatının nümunələrini rahatlıqla əldə edirlər. Həmçinin oxucular mərkəz daxilində çay və kofe içərək də kitab oxumağın həzzini yaşaya bilərlər.
Regional Mədəniyyət idarəsinin oxuculara müraciətini olduğu kimi təqdim edirik.
Əziz oxucular, kitabsevərlər, məktəblilər!
Siz hər kitab oxuyanda ağaclar ölümdən sonrakı həyata inanırlar, sizin oxuduğunuz hər kitab ağaclara yenidən can verir, onlara ikinci həyat bəxş edir və əbədiyyət qazandırır.
2024-cü ilin “Yaşıl dünya naminə həmrəylik ili” elan edilməsi haqqında Azərbaycan Respublikası Prezidentinin 25 dekabr 2023-cü il tarixli Sərəncamı ilə əlaqədar olaraq, Sabirabad rayon İcra Hakimiyyəti, Mil-Muğan Regional Mədəniyyət İdarəsi, Regional Təhsil İdarəsi, Regional Gənclər və İdman İdarəsi, “Hophopnamə” Kitab Mərkəzi və “Mücrü” nəşriyyatının təşkilatçılığı ilə Sabirabad şəhərində “İKİNCİ HƏYAT” adlı kitab sərgisi keçiriləcək.
Tarix: 12.01.2024 Saat 11:00-18:00
Məkan: “Hophopnamə” Kitab Mərkəzi
Məqsəd: Regionlarda mütaliəyə olan marağın artırılması
✅ Qeyd: Sərgidə nümayiş olunan bütün kitablar 1 (bir), yaxud 2 (iki) manat şərti qiymətlə satışa çıxarılacaq.
Hər kəsin kitabı olacaq.