“Sizin ananız bu qadındır” deyə uşaqları damğalamaq… – Yazıçıdan ETİRAZ

Düşünürəm ki, insanlar nəyin qarşılığında insanlığını itirə bilər? Təbii ki daha çox nəyəsə vadar olarsa. Əslində heç onda da olmamalıdır. Deməli, saytların yayımladığı xəbər başlıqlarına baxıram. Eləcə də digər sosial şəbəkələrdə paylaşılan xəbərlərə, ona yazılan rəylərə. Bu nə deməkdir ki, “Qarajda sevgilisi ilə meyiti tapılan iki uşaq anası…” Yəni o “iki uşaq” sözü mütləq idimi yazılsın?

Baş verən hadisə iki nəfərin özəl həyatlarına aid olan bir olaydır. Bura o uşaqlar niyə yamaq olmalıdır? Niyə diqqət o uşaqların kimliklərinin üzərinə yönəlməlidir ki? Tutaq ki lap beş uşaq anasıdır, ya da heç uşaqsızdır. Bu olayın nəyini dəyişir? O zibilə qalmış reytinqdən ötrü, diqqət çəkməkdən ötrü heçmi həmin vurğuladığınız, xəbərin içinə pərçimlədiyiniz uşaqların həyatda var olmaqları, onların gələcəkləri düşündürmədi heç kimi? Bircə günlük baxış sayı üçün “Sizin ananız bu qadındır” yükünü o uşaqlara yükləməklə, bir ömür o damğanı vurmaqla vicdanlar sızıldamadımı? Onlara bu cür emisional təsir etmək təkcə vicdan məsələsi deyil, bunu dərk etmək qabiliyyətinin, xəbərin mahiyyətinə varmaq savadının, jurnalistika peşəkarlığının olmamasıdır.

Lap insanlığı da kənara qoyuram. Əslində belə təhlükəli xəbər başlıqlarına güclü nəzarət olunmalıdır. Bəli, təhlükəli deyirəm. Çünki, belə başlıqların altında böyük travmalar yatır. Bu cür vicdansız kobudluğun qəbullanması və xəbər olaraq sosial şəbəkələrdə paylaşılması kasad bir zehniyyəti ortaya qoyur. Təbii ki əxlaqlı olub, olmamaq hər kəsin öz işidir, amma etik qaydalara riyayət etmək mütləqdir, kim olursan, ol.

Xəbər doğru olsa belə, ictimai maraq naminə uşaqların gələcəyini travma altına atmaq düzgün deyil. Nəinki media, bir cəmiyyət olaraq belə mövzularda diqqətli olmaq lazımdır. Böyüklərin qurub, yaratdığı dünyada uşaqlar da görünməlidir.