Sarayda məktəb dərdi: “Həm özümüz, həm də uşaqlarımız küçələrdə qalmışıq” – VİDEO

Saray qəsəbəsində yerləşən 1 saylı tam orta məktəb artıq 2 ildən çoxdur ki, təmirə bağlanıb. Buranın şagirdləri Corat qəsəbəsində yerləşən məktəblərdən birində təhsillərini davam etdirirlər. Ən böyük çətinlik də elə bundan başlayır. Valideynlər bildirir ki, məktəbin uzaq olması həm onlara, həm də övladlarına ciddi problem yaradır.

Musavat.com-a danışan valideyn Dürdanə Əliyeva deyir ki, 3 övladı var və onların dərs növbəsi fərqli saatlardadır. Buna görə də uşaqlarını məktəbə aparıb gətirməkdə çətinlik çəkir.

“Uşaqlarımız Corat məktəbində oxuyurlar. Övladımın birinin dərsi başlayanda digərinin dərs saatı bitir. Mən məcburam ki, 5 yaşlı uşağımı evdə tək qoyub Corata onların arxasınca gedim. Ev üzü görmürük. Bütün günü çöllərdə qalmışıq. Uşaqlar Coratdan Saraya gəlincə axşam 8 olur. Yorğun uşaq evə gəlib nə dərsi oxusun, günü yollarda keçir. Saraydakı məktəbimizin təmiri bitsəydi, onları dərsə aparıb gətirmək asanlaşardı, həm də özləri yollarda yorulmazdılar. Bu məktəb Sarayda yaşayan hər kəsə yaxındır. Övladlarımız axı niyə enerjilərini yollara həsr etməlidirlər”, – deyə o bildirib.

Valideynləri məktəbin təmirinin nə zaman bitəcəyi maraqlandırır. Onlar təhsil ocağının tezliklə təhvil verilməsini istəyirlər.

“Biz məktəbimizin təmirinin tez başa çatmasını istəyirik. Müəllimlər də yollarda qalıb, hamısı Sarayda yaşayır. Danışılası dərd deyil. Aidiyyəti qurumlara məktub yazıb təmirlə bağlı maraqlanmışıq, amma hansısa cavab almamışıq. Məktəbin direktoru bildirir ki, təmir işlərinin fevral ayında bitməsi gözlənilir. Ona da ümidimiz yoxdur. Məktəbi hasarlayıblar, orada hansısa işin getdiyini görmürük”, – deyə onlar müraciətlərində bildiriblər.

Məsələ ilə bağlı Elm və Təhsil Nazirliyinə müraciət etsək də, məktəbin təmirinin nə zaman bitəcəyi ilə bağlı hansısa məlumat ala bilmədik.