Müəllimlər sertifikasiya barədə açıqlamanın gecikməsindən narahatdır

Azərbaycanda müəllimlərin növbəti dəfə sertifikasiyadan keçəcəyi gözlənilir. Sertifikasiyanın nə vaxt başlayacağı, hansı fənninin müəllimlərinin cəlb ediləcəyi isə rəsmi olaraq açıqlanmayıb.

Proses.az xəbər verir ki, bir neçə gün əvvəl modern.az-a daxil olan məlumata görə, 2025-ci ildə 7 fənnin –  tarix, fizika, kimya, biologiya, coğrafiya, texnologiya, informatika müəllimlərinin sertifikasiyası təşkil ediləcək.

Ancaq fənlərlə bağlı yekun qərar hələlik verilməyib. Məsələ ilə bağlı məktəb direktorlarına məlumat verildiyi bildirilir. Elm və təhsil naziri Emin Əmrullayevin son həftələrdə məktəb direktorları ilə görüşlərdə də sertifikasiya prosesinin müzakirə edildiyi, onlara bu barədə tapşırıqlar verildiyi qeyd olunur.

Məsələ barədə qərarı Elm və Təhsil Nazirliyinin Təhsilverənlərin Sertifikatlaşdırılması Şurası verir. Ancaq Şuranın hələlik iclası keçirilməyib. Prosesin gecikməsi müəllimlər arasında narazılığa səbəb olub.

Modern.az-a danışan elm və təhsil eksperti Kamran Əsədov bildirib ki, təqvim ilində həyata keçiriləcək fəaliyyətlərlə bağlı öncədən planlaşdırma elan olunmalıdır:

“Bu istiqamətdə Dövlət İmtahan Mərkəzinin çox yaxşı bir təcrübəsi var. DİM 2025-ci ildə keçirəcəyi müxtəlif imtahanlarla bağlı qrafiki artıq elan edib. Hər kəs özünün işini ona uyğun olaraq müəyyənləşdirir. Baxmayaraq ki, bu insanlar müəllimdirlər, ancaq onlar təkcə ixtisaslarından imtahan vermirlər. Eyni zamanda digər kurikulum və tədris materiallarından da suallara cavab verirlər. Ona görə də imtahan vaxtı birmənalı şəkildə öncədən elan olunmalıdır. Hesab edirəm ki, 2-3 ay qalmış imtahan vaxtının elan edilməsi müəllimlərdə müəyyən qədər psixoloji gərginlik yaradacaq”.

Ekspert bildirib ki, sertifikasiya Azərbaycanda təhsil sisteminin inkişafına yönəlmiş vacib prosesdir:

“Amma bu prosesi sürətli etmək yaxşı hal deyil, hətta bu qanunvericiliyə də ziddir. Çünki müəllimlərin sertifikasiya imtahanlarının yay aylarında elan edilsə, müəllimlər vaxtlarını orta məktəblərdə dərslərindənsə bu imtahana hazırlaşmağa daha çox vaxt ayırmaqla keçirəcək. Ona görə də biz vaxtı ən azından 7-8 ay əvvəl elan etməliyik ki, müəllimlər də işlərini qura bilsinlər. Onların birdən-birə sertifikasiya prosesinə daxil olması tədrisin təşkilində də müəyyən gərginlik yaradacaq. Hesab edirəm ki, biz bu yanaşmanı dəyişməliyik. Bu çətin proses deyil, onsuz da bütün fənnlər üzrə sertifikasiya olacaq. Biz elan etməliyik ki, hansı ayda hansı fənnlər üzrə sertifikasiya olacaq, proses necə təşkil olunacaq. Bunu nə qədər gec etsək tədrisin gedişinə mane olacağıq”

K.Əsədov qeyd edib ki, Təhsilverənlərin Sertifikasiyası Şurasının yığışması o qədər  çətin məsələ deyil:

“Onlar başqa planetdən gəlməyəcəklər, ya da hansısa çətin proses təşkil olunmayacaq. İndiyə qədər ibtidai sinif, Azərbaycan dili və ədəbiyyat, ingilis dili müəllimlərinin sertifikasiyası olub. Biz növbəti hansı fənnlərin imtahanının keçiriləcəyini konkret olaraq elan etməliyik. Tədrisin ən vacib elementi vaxtı düzgün planlaşdırmaqdır. Amma təhsilin idarə edilməsindəki problem ümumi tədrisin təşkilinə də öz mənfi təsirini göstərir”.