Tərtərdə bir ailənin 4 üzvünün ölümünə quş yuvası səbəb olub – TƏFƏRRÜAT-YENİLƏNDİ

Tərtərdə bir ailənin 4 üzvünün dəm qazından boğularaq ölməsi ilə bağlı yeni təfərrüatlar məlum olub. Belə ki, hadisə Kəlbəcərdən olan keçmiş məcburi köçkünlər üçün salınmış Sarov qəsəbəsindəki həyət evində baş verib.

Bu barədə Teleqraf-a ailənin yaxınları məlumat veriblər.

Qeyd olunub ki, ailə qəsəbədə iki il imiş ki, keçmiş məcburi köçkün kimi müvəqqəti məskunlaşıbmış. Verilən məlumata görə, hadisədən əvvəlcə qonşular xəbər tutublar. Saat 10 -11 radələri olsa da, evdən heç kimin çıxmadığını görən qonşular mənzilə daxil olub və ailənin 4 üzvünün vəfat etdiyini aşkar ediblər.

Bildirilib ki, meyitlər tibbi ekspertiza üçün prokurorluğa göndərilib. Onlar yaxınlarının dəfn olunduğu Bəyəmsarov kənd qəbirstanlığında torpağa tapşırılacaqlar. Ehtimal edilir ki, ailənin ölümünə səbəb qaz sobası olub. Hadisə yerinə hüquq-mühafizə orqanlarının əməkdaşları, polis işçiləri və əməliyyatçılar gəliblər, araşdırma aparılır.

Sarov kəndinin icra nümayəndəsi Surxay Hüseynov hadisənin təfərrüatları ilə bağlı Teleqraf-a açıqlama verərərk deyib ki, hadisədən ilk olaraq qonşular xəbər tutublar və qapını xeyli döydükdə cavab ala bilməyiblər.

“Qonşular pəncərədən baxaraq görüblər ki, ailənin bütün üzvləri yorğan-döşəkdədir. Adi dəmirdən düzəldilən qapını qıraraq evə daxil olublar. Onlar iki il idi ki, qəsəbədə yaşayırdılar. Sarov kəndinə Bəyimsarovdan, yəni qonşu kənddən gəlmişdilər. İlkin ehtimala görə, hadisəyə səbəb qaz sobasının borusunda quşun yuva qurması olub. Havalar isti olduğu üçün sobadan istifadə edilməyib. Bu yaxınlarda yağışlı havalarda yenidən istifadə etməyə başlayıblar. Soba istifadə edilmədiyi müddətdə quş onun borusunda yuva qurub və samanla sobanın borusunu doldurub. Hadisədən sonra soba söküləndə saman çöpləri aşkar edilib və sobanın yanar vəziyyətdə olduğu müəyyən olunub”.

Kənd icra nümayəndəsi ailə başçısının fərdi işlərlə məşğul olduğunu vurğulayıb:

“Ailənin başçısı təsərrüfatla məşğul olurudu. Əkin əkər, kartof sahələri salar, lazım olanda ağac da əkərdi. Bir sözlə, zəhmət adamı idi. Dəfn mərasimi Bəyimsarov kəndində olacaq”.

***

12:46

TƏRTƏR, 21 aprel. TELEQRAF

Tərtərdə bir ailənin 4 üzvünün dəm qazından boğularaq öldüyünün bəzi təfərrüatları məlum olub.

Teleqraf-ın bölgə müxbiri xəbər verir ki, ilkin məlumatlara görə, ailə evdə İran istehsalı olan qızıdırıcı sobadan istifadə edib.

Ehtimal olunur ki, hadisəyə səbəb həmin məişət cihazından qaz sızması olub.

Ailə üzvlərinin ölümünü əvvəlcə qonşular biliblər. Onlar evə pəncərəni sındıraraq daxil olublar, sonra isə 4 nəfərin meyiti aşkar edilib.

Faktla bağlı araşdırma başlanılıb.

***

12:12

BAKI, 21 aprel. TELEQRAF

Tərtərdə bir ailənin 4 üzvü dəm qazından zəhərlənərək ölüb.

Teleqraf xəbər verir ki, hadisə rayonun Kəlbəcərdən olan keçmiş məcburi köçkünlər üçün salınmış Sarov qəsəbəsində baş verib.

Qəsəbədə yaşayan əslən Kəlbəcər rayonunun Babaşlar kəndindən olan bir ailənin 4 üzvü – 1995-ci il təvəllüdlü Tağızadə Ülfət Mayıs oğlu, həyat yoldaşı 1998-ci il təvəllüdlü Tağızadə Əfsanə Fəqan qızı, övladları 2018-ci il təvəllüdlü Tağızadə Ümid Ülfət oğlu və 2020-ci il təvəllüdlü Tağızadə Sürəyya Ülfət qızı yaşadıqları evdə dəm qazından boğularaq ölüblər.

Hazırda hüquq-mühafizə orqanlarının əməkdaşları hadisə yerinə baxış keçirirlər.

Qeyd edək ki, hadisə barədə ilk xəbəri Qafqazinfo yayıb.