Müharibəni birlikdə bitirəcəklər – Tramp-Ərdoğan danışıqlarının ŞOK DETALLARI

ABŞ Prezidenti Donald Tramp və Türkiyə Prezidenti Rəcəb Tayyib Ərdoğan arasında telefon danışığı baş tutub. Danışıq zamanı iki ölkə arasında əməkdaşlığın gücləndirilməsi və regional məsələlər müzakirə olunub.

Musavat.com xəbər verir ki, ABŞ-də Respublikaçılara yaxınlığı ilə tanınan Fox News Tramp və Ərdoğan arasında keçirilən görüşün “məhsuldar və müsbət” olduğunu vurğulayıb. Nəşr ABŞ prezidentinin ilk prezidentliyi dövründə Türkiyə ilə əla münasibətləri olduğunu qeyd edib.

Fox News yazır ki, tərəflər xüsusilə Ukraynadakı münaqişəyə son qoymaq üçün əməkdaşlıq etmək barədə razılığa gəliblər.

Bloomberg nəşri isə iki liderin görüş zamanı bir çox mövzuda konsensusa gəldiyini, Ərdoğan və Trampın Ukraynadakı müharibənin sona çatması üçün birgə işləmək mövzusunda eyni fikirdə olduğunu diqqətə çatdırıb. Ərdoğanın Trampı Türkiyəyə dəvət etdiyini vurğulayan Bloomberg Türkiyə liderinin də Vaşinqtona səfər edə biləcəyi barədə məlumat yayıb.

Moscow Times isə xatırladıb ki, Türkiyə NATO üzvüdür və Ankara Rusiya-Ukrayna müharibəsinin başlamasından sonra iki Qara dəniz qonşusu ilə yaxşı münasibətlər saxlamağa çalışıb və iki dəfə müharibəyə son qoymaq üçün danışıqlara ev sahibliyi edib.