Suriya prezidenti: “Biz müharibədən qorxmuruq, amma…”

Suriya hökuməti qarşıdurmaların yaşandığı Əs-Süveyda şəhərindən qüvvələrini geri çəkməyə başladığını açıqlayıb.

Ölkə.Az xarici KİV-ə istinadla xəbər verir ki, bu barədə Suriya Müdafiə Nazirliyi məlumat yayıb.

“Suriya ordusu qeyri-qanuni qruplara qarşı missiyasını tamamladıqdan sonra dövlət və Dürzi ( və ya druz) liderləri arasında atəşkəs razılaşmasına uyğun olaraq Əs-Süveydadan geri çəkilməyə başlayıb” – məlumatda deyilir.

Suriya Prezidenti Əhməd Şəra dünən axşam xalqa müraciət edib. O, Süveydada baş verən qarşıdurmalar zamanı druzlara qarşı hücumlara görə məsuliyyət daşıyanların cavab verəcəklərini vurğulayıb.

“Dürzilər dövlətin himayəsi və məsuliyyəti altındadır” – o deyib.

Şəra bildirib ki, əsasən druzların yaşadığı Süveyda şəhərində təhlükəsizliyə yerli qruplar cavabdeh olacaq.

Suriya prezidenti İsraili Suriyanı yeni müharibəyə sürükləmək cəhdində ittiham edib.

Türkiyə, Amerika və Ərəb vasitəçiliyinin bölgəni qeyri-müəyyən bir aqibətdən xilas etdiyini bildirən Şara sözlərinə belə davam edib:
“Biz müharibədən qorxmuruq, lakin Suriya xalqının maraqlarını daha çox məhv olmaqdan üstün tuturuq”.

İsrail ordusu druzların mərkəzləşdiyi Suriyanın cənubunda baş verən hadisələri və Suriya hökumətinin hərəkətlərini izlədiyini açıqlayıb. Suriya sərhədinə əlavə qüvvələrin göndəriləcəyi də bildirilib.

Qeyd edək ki, Süveyda şəhərində qarşıdurmalar ötən bazar günü bədəvi qəbiləsinə bağlı qüvvələrin bir druzi saxlayıb əmlakını qarət etməsi ilə başlayıb. Bölgədəki Dürzilər qəbiləyə aid nəqliyyat vasitələrini ələ keçirib. Hər iki tərəf mülki vətəndaşları oğurlayaraq həbs edib, silahlı toqquşmalar baş verib. İsrail ordusu döyüşləri dayandırmaq üçün ötən bazar ertəsi və çərşənbə axşamı Sveydaya gedən Suriya hökumət qüvvələrini hədəfə alıb.

Suriyanın müdafiə naziri general-mayor Murhaf Əbu Kasra dünən əsasən druzların yaşadığı Süveyda şəhərində atəşkəs elan edərək, yalnız atəş açanlara cavab verəcəklərini bildirib. Kasra şəhərdəki yoxlama əməliyyatından sonra Süveyda üzərində nəzarətin Daxili İşlər Nazirliyinə bağlı polis qüvvələrinə veriləcəyini vurğulayıb. Bu gün bölgədə atəşkəs pozulub və hökumət qüvvələri ilə druz qrupları arasında toqquşmalar yenidən başlayıb. Yenidən başlayan döyüşlərlə İsrail druz əhalinin təhlükəsizliyini bəhanə edərək, Dəməşqdə Prezident Sarayının yerləşdiyi əraziyə, Baş Qərargaha və Dəra şəhərinə hava zərbələri endirib.

Suriya İnsan Haqları Müşahidə Qrupu ötən bazar günü başlayan qarşıdurmalarda 300-dən çox adamın həlak olduğunu bildirib.