ABŞ-ni qarışdıran iddia: Tramp günlərdir haradadır? – FOTO

ABŞ Prezidenti Donald Trampın günlərdir ictimaiyyət qarşısına çıxmaması onun səhhəti ilə bağlı iddiaların yayılmasına səbəb olub.

Ölkə.Az xarici KİV-ə istinadla xəbər verir ki, ABŞ lideri çərşənbə axşamı Nazirlər Kabinetinin iclasından sonra ictimaiyyət qarşısına çıxmayıb.

Həmçinin onun həftə sonu üçün planlaşdırılan tədbirinin olmadığı öyrənilib.

Bu da sosial şəbəkələrdə Trampın səhhətində ciddi problemlərin olması barədə müzakirələr yaradıb.

Son bir neçə saatda sosial şəbəkələrdə “Tramp haradadır?”, “Tramp ölüb?” kimi ifadələr trend olub.

Trampın bu iddiaları yalanlamaq üçün heç bir addım atmaması diqqəti çəkib.

“Donald Tramp çərşənbə axşamından bəri ictimaiyyət arasında görünmür və həftə sonu üçün heç bir planı yoxdur. O haradadır? Ölkəni kim idarə edir?”, – deyə “Respublikaçılar Trampa qarşı” adlı məşhur “X” hesabının paylaşımında deyilir.

Fiziki olaraq görünməsə də, prezident “Truth social” hesabında aktivlik nümayiş etdirib.

Bütün bunlar fonunda ABŞ-nin vitse-prezidenti J.D.Vansın “USA Today”ə bu yaxınlarda verdiyi müsahibə diqqət çəkib. O, Trampın səhhətinin yaxşı olduğunu, lakin dəhşətli bir faciə baş verərsə, prezidenti əvəz etməyə hazır olduğunu bildirib.

Qeyd edək ki, bu yaxınlarda D.Trampın ayağındakı şişkinlik və əlindəki qaralma diqqət çəkmişdi. Bununla belə Ağ Ev prezidentin səhhətinin qaydasında olduğunu açıqlamışdı.