Finlandiyada öldürülən azərbaycanlı qadın hamilə imiş…

Məlum olduğu kimi, bir neçə gün əvvəl Finlandiyanın Espoo şəhərində azərbaycanlı qadın keçmiş əri tərəfindən amansızlıqla qətlə yetirilib. Adı açıqlanmayan 30 yaşlı qadın iki uşaq anası olub.

Proses.az Qafqazinfo.az-a istinadən xəbər verir ki, Finlandiyanın “Ilta-Sanomat” qəzeti həmin hadisənin təfərrüatı haqda yazıb.

Məlumatda hadisə iştirakçılarının adı və milliyyəti açıqlanmasa da, qadının 44 yaşlı keçmiş əri tərəfindən güllələndiyi qeyd olunub.

Bildirilib ki, həmin şəxs keçmiş həyat yoldaşına yaşadığı binanın girişində şüşənin arxasından tapança ilə atəş açıb. Cinayət aləti polis tərəfindən götürülüb.

Ölkənin yerli polisinin məlumatına görə, qadın qətlə yetirilərkən hadisə yerində onun iki övladı da olub.

Qəzet, həmçinin yazır ki, ailə əvvəllər Varkaus bölgəsində yaşayıb. Cütlük 2024-cü ilin yazında boşanmaq üçün məhkəməyə müraciət edib. Onların elə həmin vaxtdan ayrıldığı, qadının yeni münasibətə başladığı və hamilə olduğu bildirilir. 

“Hadisədən təqribən iki həftə əvvəl qadın keçmiş əri ilə bağlı məhdudlaşdırıcı tədbirlər üçün məhkəməyə müraciət edib. Məsələ ilə bağlı məhkəmə iclası isə hələ baş tutmayıb. Qətli törədən şəxsin Finlandiyada ciddi məhkumluğu olmayıb. O, təqribən 10 il əvvəl bir neçə xırda xuliqanlıqda təqsirləndirilsə də, zorakılıq cinayətinə görə məhkumluğu yoxdur”, – deyə qəzet yazıb.

Bununla yanaşı, polisin məlumatına görə, qətli törədən şəxs əməlini etiraf edib və istintaqla əməkdaşlıq etməyə razılaşıb. Digər detallar isə açıqlanmayıb.