“Yaxşı kişiyə heç kəs xəyanət etməz” – Psixoloqdan QALMAQALLI AÇIQLAMA

Son aylarda Azərbaycanda ailədaxili münaqişələr və xəyanət zəminində baş verən cinayətlərin artması cəmiyyətdə ciddi narahatlıq yaradıb. Sosial şəbəkələrdə yayılan hadisələr və məhkəmə materialları göstərir ki, qısqanclıq, etimadın pozulması və emosional gərginlik bir çox hallarda faciəvi sonluqlara gətirib çıxarır. Ailə dəyərlərinin zəifləməsi və psixoloji dəstəyin çatışmazlığı bu cür cinayətlərin əsas səbəblərindəndir.

Proses.az xəbər verir ki, tanınmış psixoloq Samirə Bağırova Manset.az-a açıqlamasında bildirib ki, həm xəyanətin, həm də xəyanət sonrası cinayətin kökün bir sıra fərqli psixoloji nüanslar dayanır:

“Bir kişi öz yoldaşına və ya öz sevgilisinə əl qaldırdıqda o, artıq bunu dəfələrlə də daha əvvəl beynində edib. Bir gün gəlib elə bir vəziyyətə çatır ki, hərəkətə keçir.

Düşündüyü məqamlarda həmişə o, təhlükə siqnalları olur. Bu, hərəkətlərdə, səs tonunda və s. göstəricilərdə ola bilər. Həmin an qadın bunu başa düşməlidir ki, bunun sonu şiddətə, hətta cinayətə gedir. Heç bir qadın yaxşı kişiyə xəyanət etmir”.

Psixoloq bildirir ki, keçmiş dövrlərdən xəyanətə, “namus”a görə törədilən cinayətlərin alqışlanması Azərbaycanda illər boyu belə cinayətlərin daha da artmasına gətirib çıxarıb:

“Xəyanətə görə cinayət törədən şəxslər bizim ölkənin adət-ənənələrinə görə daim alqışlanıb, yaxşı formada qələmə verilib. Halbuki bunun kökündə dərin psixoloji problem dayanır. Eləcə də xəyanətin də kökündə səbəblər var. Təbii ki, başlıca səbəblər maddi çatışmazlıq, emosional və cinsi tərəfdən qadının tam təmin olunmamasıdır. Bunları oxuyanlar düşünəcəklər ki, bunlar yoxdursa, qadın xəyanət etməlidir? Xeyr, etməli deyil. Mən dəfələrlə şahid olmuşam ki, qadınlar seanslara gəlir ağlayır, bu problemləri düzəltməyə çalışır, amma onların həyat yoldaşları buna razı olmurlar, problemlərin həllindən boyun qaçırırlar, psixoloqa gəlmək istəmirlər. Onlar düşünürlər ki, həkimə, psixoloqa, seksopatoloqa, androloqa getdikdə qadınları onları həmin şəxslərin yanında utandıracaqlar. Belə kişilər həm maddi, tibbi, cinsi problemlərini həll etmək istəmirlər, həm də ağır xasiyyətlərini ortaya qoyurlar, həyat yoldaşlarına normal davranmırlar və sonra xəyanət baş verdikdə cinayət törətmək kimi haqqı da özlərində görürlər. Belə olan halda sıxışmış və bu problemdən tək başına çıxa bilməyən qadın sonunda xəyanətə üz tutur. Çünki hər kəs bu həyatda normal yaşamaq, xoşbəxt olmaq istəyir”.

Psixoloq qeyd edib ki, kişilərin ailə həyatını sonlandırmaq istəyən qadınlara buna icazə verməmələri cinayətin siqnallarından biridir:

“Qadınlar çox vaxt düşünürlər ki, evlənəndə nələrsə düzələcək. Amma heç bir şey düzəlmir. Əksinə əgər müəyyən problemlər varsa, evləndikdən sonra bunlar daha da dərinləşir. Mübahisə zamanı hər bir söz, əslində, bir xəbərdarlıqdır. Yəni, “əsəbi olduğuna görə dedi” deyə bir anlayış yoxdur. Əsəbi olduqda deyilən söz elə birbaşa həqiqətin özüdür və qarşı tərəfin sənin haqqında tam düşüncəsi budur. Çünki o bunu deyərkən heç bir filtrdən keçirmir və birbaşa şüurundan axan formada dilə gətirir. Buna görə də elə bu sözlərdən münasibətin səviyyəsini təhlil etmək lazımdır”.

Psixoloq bütün dünyada olduğu kimi Azərbaycanda da xəyanətin daim var olduğunu və var olacağını düşünür. Onun fikrincə, xəyanətin və eləcə də səbəb olduğu cinayətlərin qarşısını almaq üçün ilk növbədə, problemin həlli yolunda addım atılmalıdır. Nə qədər ki, kişilər problemin həllindən, həkimə, psixoloqa getməkdən üz döndərəcəklər, xəyanətlərin sayı daha da artacaq.