Kəramət Böyükçöl: “Aşıq Namiq deyir ki, Kəramət məni tənqid etdiyinə görə atasına vəzifə verdilər”

“Atamın (şair Qəşəm Nəcəfzadə-red) 65 yaşı var. Düz 40 ildir ki, bədii yaradıcılıqla məşğuldur. Şeirləri dünyanın 30-dan artıq dilinə tərcümə olunub. Sovet vaxtından indiyə kimi 50 kitabı çap olunub. 2007-ci ildə Hollandiyada keçirilən Beynəlxalq şeir fesivalında Azərbaycanı təmsil eləyib. 20 ildir Yazıçılar Birliyində 350 manat maaşa işləyir. Onun kitabları çap olunanda mən heç doğulmamışdım. Amma 40 illik yaradıcılığı, şeirləri, nəsr əsərləri olan bir şair təəssüflər olsun ki, cəmiyyətdə ancaq oğlunun adı ilə gündəmə gəlir. Bilmirəm atam bununla qürur duymalıdır, yoxsa əzab çəkməlidir”.

Pravda.az-ın xəbərinə görə, bunu yazıçı Kəramət Böyükçöl bilirib.

“İndi atamın Azərbaycan Respublikası Audiovizual Şurasının üzvü təyin edilməsi haqda Prezident sərəncam imzalayıb. Yenə saytlar, sosial şəbəkələr başlayıb ki, Kəramətin atası, Kəramətin atası, Kəramətin atası… Hərə bir söz deyir. Kimi tənqid eləmişəmsə, hamısı deyir ki, Kəramət məni vurduğuna görə prezident atasına vəzifə verdi. Ölkədə nə qədər siyasi partiya varsa, hamısı deyir ki, Kəramət məni tənqid etdi, ona görə atasına vəzifə verdilər. Biri deyir, yox, məni tənqid elədiyinə görə verdilər. O birisi deyir, yox, sən kimsən ki… Məni tənqid elədiyinə görə verdilər. Heç bilmirlər “Audiovizual” nə deməkdir. Efirdə Audiovizual sözünü tələffüz edə bilmirlər deyə Kəramətin atasına vəzifə verildi deyirlər. Bunlar da özlərini belə şeylərlə əhəmiyyətli göstərməyə çalışırlar. Aşıq Namiq də deyir ki, Kəramət məni vurduğuna görə atasına vəzifə verdilər. Adam yanıb-tökülür. Kim bilməsə də, mən bilirəm ki, bu dəyər sənin istedadına, qələminə, şəxsiyyətinə və Azərbaycan dilinə verilmiş dəyərdir. Səni təbrik edirəm, öpürəm, bağrıma basıram. Sən gözəl atasan”, – o qeyd edib.