Ekoloq AÇIQLADI: “Bakıya qar bu tarixdə yağa bilər”

Bakıda yanvar ayında qar yağacağı ehtimalı ilə bağlı proqnozlar mediada gündəmə gəlib. “AccuWeather” platformasının məlumatına əsasən, gələn ilin yanvarın 20, 21 və 23-də paytaxtda yağış və qar gözlənilir.

Havanın temperaturu gündüz 8°, gecə isə 3° isti göstərilir.

Maraqlıdır ki, “AccuWeather”-in bu uzaq tarixlər üçün verdiyi proqnozlar nə dərəcədə realdır? Ümumiyyətlə, belə uzaq tarixlər üçün hava şəraitini əvvəlcədən dəqiq şəkildə proqnozlaşdırmaq mümkündürmü və bu cür məlumatların etibarlılıq faizi nə qədərdir?

Məsələyə münasibət bildirən ekoloq Qorxmaz İbrahimli Sfera.az-a açıqlamasında bildirib ki, hava proqnozları günlük, həftəlik, on günlük, aylıq verilə bilər. Onun sözlərinə görə, dəqiqlik baxımından isə, 2 ay sonra baş verəcək hava proqnozu o qədər də doğru çıxmır:

“Bu bir növ münəccimlik olur. Çünki, atmosferdə baş verən proseslər var. Daxil olan siklonlar, Sibirdən gələn hava kütlələri, arktik hava kütlələri ilə daha tez yağıntı ola bilər. Bakıda və rayonlarda belə kütlələrin təsiri nəticəsində qar yağıntısı baş verir. Yanvarın 20-si, 21-i və 23-də Bakıda gözlənilən qar və yağıntı ilə bağlı proqnoz düzgün deyil. Ola bilsin ki, yağsın, amma indidən proqnozlaşdırmaq düzgün deyil. Yəni, belə platformalar verən məlumatlara qaranti vermək olmur”.

Ekoloq əlavə edib ki, bu il qar yağıntıları normal olacaq. O bununla bağlı öz proqnozunu verib:

“Proqnoz vermişəm ki, yaxın vaxtlarda qar yağıntısı ola bilər. Amma 2 ay öncədən filan ayın bu tarixində Bakı şəhərində qar yağacağını demək, dəqiq deyil. Yağa bilər. O tarixlərdə biz tez-tez qar yağıntıları ilə qarşılaşmışıq”.