Prezident İlham Əliyevin strateji Fərmanı: Sahibkarlığa dövlət dəstəyinin daha bir parlaq nümunəsi

Azərbaycan Gömrük Təmsilçiliyi və Logistika Şirkətləri Assosiasiyasında (AGTL) Azərbaycan Respublikasının Prezidenti İlham Əliyevin 2025-ci il 5 dekabr tarixli Sərəncamı ilə təsdiq edilmiş “Etibarlı Tərəfdaş Konsepsiyası” geniş müzakirə olunub.

19 dekabr 2025-ci il tarixində AGTL-nin tərkibində fəaliyyət göstərən alt komitələrin nümayəndələrinin iştirakı ilə keçirilən birgə görüşdə Konsepsiyanın 8.1.3-cü bəndi və onun tətbiq mexanizmləri ətrafında ətraflı fikir mübadiləsi aparılıb. İştirakçılar bu bəndin gömrük–logistika sahəsində institusional əməkdaşlığın gücləndirilməsinə, qarşılıqlı etimad mühitinin formalaşdırılmasına və biznes proseslərinin sürətləndirilməsinə xidmət etdiyini qeyd ediblər.

Görüşdə xüsusi vurğulanıb ki, Prezident İlham Əliyevin imzaladığı bu Sərəncam dövlətin sahibkarlığa verdiyi yüksək dəyərin və ardıcıl siyasi iradənin bariz göstəricisidir. Son illər dövlət başçısının rəhbərliyi ilə Azərbaycanda sahibkarlığın inkişafı prioritet istiqamətə çevrilib, biznes mühitinin liberallaşdırılması, vergi və gömrük sahəsində islahatların aparılması, şəffaflığın və elektron xidmətlərin genişləndirilməsi istiqamətində mühüm addımlar atılıb.

Sahibkarlar bildiriblər ki, Prezident İlham Əliyevin təşəbbüsü ilə həyata keçirilən islahatlar özəl sektorun dövlətin etibarlı tərəfdaşına çevrilməsinə, yerli biznesin beynəlxalq bazarlara çıxış imkanlarının genişlənməsinə və investisiya mühitinin daha da cəlbedici olmasına şərait yaradır. “Etibarlı Tərəfdaş Konsepsiyası” isə məhz sahibkarların fəaliyyətinin stimullaşdırılmasına, məsuliyyətli və şəffaf biznes subyektlərinin təşviqinə yönəlmiş mühüm mexanizm kimi dəyərləndirilib.

Müzakirələr zamanı qeyd olunub ki, sahibkarlığın davamlı inkişafında gömrük orqanları ilə gömrük təmsilçiləri arasında sıx və səmərəli əməkdaşlıq həlledici rol oynayır. Bu əməkdaşlıq təkcə idxal–ixrac əməliyyatlarının asanlaşdırılmasına deyil, həm də logistika zəncirində vaxt və maliyyə itkilərinin azaldılmasına xidmət edir.

Görüşdə alt komitələr tərəfindən Konsepsiyanın praktiki icrası ilə bağlı konkret təkliflər irəli sürülüb, sahibkarların maraqlarının qorunması və biznes mühitinin daha da yaxşılaşdırılması istiqamətində fikir mübadiləsi aparılıb. İştirakçılar Prezident İlham Əliyevin sahibkarlığa yönəlmiş siyasətinin ölkənin dayanıqlı iqtisadi inkişafının əsas sütunlarından biri olduğunu xüsusi vurğulayıblar.